08 oktyabr 2026-cı il tarixində Ağstafa Rayon Uşaq-Gənclər İnkişaf Mərkəzinin “Gənc diyarşünas” dərnəyinin şagirdləri Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin idarəetməsinə verilmiş “Keşikçidağ” Dövlət tarix-mədəniyyət qoruğunun inzibati binasında qonaq olmuşlar.
Görüş çərçivəsində şagirdlər ilk olaraq qoruq ərazisində yerləşən Keşikçidağ Kurqanlar Vadisində aparılmış elmi-arxeoloji qazıntılar zamanı aşkar edilmiş maddi-mədəniyyət nümunələrinin nümayiş olunduğu kiçik muzey tipli stendlə tanış olmuşlar. Daha sonra şagirdlərin iştirakı ilə dəyirmi masa keçirilmiş, qoruğun ərazisində yerləşən tarix-mədəniyyət abidələri, eləcə də Keşikçidağ Kurqanlar Vadisində həyata keçirilən “Keşikçidağda elmi-arxeoloji tədqiqatlar və Yay Məktəbi” layihəsi haqqında videomateriallar nümayiş etdirilmişdir. Qoruğun əməkdaşları tərəfindən şagirdlərə Keşikçidağın arxeoloji və mədəni irsi, aparılan tədqiqatların əhəmiyyəti və gənc nəslin milli-mədəni irsin öyrənilməsi və qorunmasında rolu barədə ətraflı məlumat verilmişdir. Tədbir gənclərin tarix və arxeologiyaya marağının artırılması, yerli mədəni irsin daha yaxından tanıdılması və biliklərinin zənginləşdirilməsi baxımından əhəmiyyətli olmuşdur.
